يا عابد الدينار

للفاض حسنَّها وخل اللقافه
وشفيك يا مخلوق ضايق وملقوف

ماتدري انك في بريدي اضافه
ماغير ضغطت زر وتصير محذوف

ترى كثير الهرج ماحد يخافه
من زاد هرجه قالوا الناس سفسوف

بينه وبين اهل المراجل مسافه
لن الردي بين الرجاجيل معروف

لا اقبل عليهم يرقبون انصرافه
وليا انصرف من مجلسه ماله اشفوف

ما ينقبل كود المجامل وشافه
دايم ودربه بالفسالات محفوف

هرجه هزيل ويمتدح بالخرافه
كثر الدريف يخلَّي الهرج معيوف

ما كل من يهرج بهرجه طرافه
ثقيل هرج الحشم له هرج مقطوف

ذيب الغدر تبعد خطاوي مطافه
والثعل ثعل ولا مشاء مشي مخفوف

الذيب يتعشاء شواها ولافه
والثعل يتعشاء عشاء ذيب مليوف

لا واحسافه يا زمان الحسافه
فيك المغطى يا زمن صار مكشوف

الناس كانت كل فاهي تعافه
واليوم قد هو شي عادي ومألوف

من كان قبل اليوم هابي مضافه
وقت البقش خلاه بالناس مضيوف

لا من ترشح في زمان الكلافه
كلن يصوَّت له من الجوع مكلوف

ويطول عنقه مثل عنق الزرافه
بالمنصب اللي حاز فارح ومهفوف

تلقاه بوراق الكتب والصحافه
وبشاشة التلفاز له وجه معطوف

الله واكبر يا زمان اللخلافه
الأمن سايد كان لا جوع لاخوف

لا اتزخرفت دنياك لك بالسخافه
يا عابد الدينار لك يوم وتشوف

تلقى زخارفهاء بعينك لُفافه
من حين توطي القبر بقماش ملفوف

لا زوج لا اولاد لا اهل دافه
لا جاه لا منصب ولا بيت مسقوف

تذهب وخلَّفت الذهب والصرافه
وتلقى عملك بحفرة القبر مصروف