ابن حليس

البارحه من شافني قال به جن
امشي واهذري واضرب اكفوف بكفوف

في داخلي همن كما النجر لا دن
متمركزن باقصى المعاليق بالجوف

يطحن ضلوعي مثل مايطحن البن
يده بيد عودن لفى بيته ضيوف

الحظ الاقشر لو اوصف مثل من
لعبة بلوت وجالسن ضد ملقوف

اخذ حكم ويقول جيبه ابي صن
ولا قلت قبلك بالدبل صرت مرجوف

والوقت لو يضحك مبّين لي بسن
ياسرع مايكشر يغيب لي الشوف

لّكّن يابن حليس غن الهوى غن
الناس ماينفع بها مد معروف

ابعد عن اللي حكيهم راحن وجن
وهذي لها عينٍ وهذي لها اردوف

اعراض خلق الله لهم لعبه وفن
مايفرقون القطن من خامة الصوف

العين مثل العين والسن بالسن
حكمه على شين مقسم ومنصوف

واختامها بعوذ ربي من الجن
واعوذ من همن مورث لي الخوف