ياشين لا حبيت من قلبك إنسان
وهوبلا يمك ولا بأنت حوله
لا دارين عنك ولا فيك هيمان
وعليه قلبك باين(ن) في ميوله
المشكلة هي بالحقيقة يا إخوان
مدري بصراحه !! كيف ودي أقوله
قلبي هوا (نسرين طافش) بكتمان
من شفتها والقلب تجري سيوله
يضخ قلبي له من الشوق أطنان
لو سال ع الصمان تشعب سهوله
ممثلة شامية(ن) شوفها جنان
وا هني من مبسم ثغرها يطوله
اليوم بمسلسل (صبايا) لها شان
عشيقت(ن) بين الصبايا خجولة
تبغا تحب .. وأنا بهم حيل ولهان
ياليت بالتلفاز باب(ن) واطوله
واخذه من يده والمه بالاحضان
وابدا أبوسه لين ياضح ذبوله
نبدا مسيرة حب بأنغام والحان
وضحكات داعبها الغلا في وصوله
نصعد معاً نحو الثريا الإثنان
وكل الفضا ,, وياه أبدا اجوله
قصة غلا // لكنها بدون خلان
عاشت يتيمه دون دورالبطوله
شفتوا شلون الحب ساطي وسلطان!!
بالله قولوا ! كيف عشقي انوله؟؟
لو اضمنه ياتي على قلب شفقان
لسوق له ذود(ن) وراعي برحوله
ولشري لجل عينيه فله ب لوزان
ومصيافها لا رادت بأي دوله
وحسابها ب جنيف بالمال مليان
بيورو ودولار(ن) وين(ن) تعوله
طال الحكي يا خوك والراس عمسان
لا هنت يا غانم حفيد الرجوله
عطني فناجيلك من دلال رسلان
كيف الرجال اللي بصفرا معموله
ولا دام تو الصبح ياخوك مابان
والجو /كن/ الخير بادي بهطوله
زانت لنا السجه على (سطوح بركان)
فيها اسلي خاطري عن ميوله
أنعم بجو(ن) هادي(ن) مابه إنسان
واطلق خيالي لجل اصفي ذهوله
وإذا رجعنا عقب تصفيت الاذهان
إن راده ألله الدش بقطع ذيوله
وش لي بحب(ن) ما درا بقلب هيمان
لا دارين عنه,,, ولا هوب حوله!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين