دلال الوجع - حنان آل فاضل

لا واهنيه واحد ٍ ما شكى الهم
ما شدته ضيقه ونفسه بكاها

قلبه صحيحٍ ما رشف ضيم واغتم
سالي... ودنياه الرديّه نفاها

باسه شديدٍ..راسي الساس ما اهتم
يضمر جروحه.. لو تطاول بناها

شكواي لله... كان للجرح بي فم
ثرثار من يومه..حياتي غزاها

الدمع حي ٍ داخل العين يا كم
يذرف على الخدين يطفي ضياها

ما كنه إلا لحظة الموج ف/ اليم
من حرّة الضيقة ومن حرّ داها

حزني ينادي من وسط خافقي قم
يا جرح ٍ أبطا بالمحاني كواها

ياليت قلبي من حياته تعلم
وأتقن دروس المعضله واحتواها

ما كان وجه الجرح يسري به الدم
وما كنت أنا اسمح له خفوقي يطاها

من كثر مآبي..قلت للجرح ياعم
الروح تشكي.. وأنت سبة عناها

دلال الوجع مشروب وبهارها سِم
وأنا احتسيه بداخل الجوف ماها

والحين آنا مليت وأرجوك..قل تم
هذي خفوقي.. عفتها من بلاها

جاتك ولك حرية الأمر..واعلم
ما اجيك أدور.. بعد هذا دواها

© 2024 - موقع الشعر