صوت الحنين - فواز الهفتاء

يابو عيون ً على درب الوصل ذبله
اكتب لك حروف شعري وانت تمحاها

خلّك تجافيك هذا ما يناسبله
مشاعرك ليه يوم تكف يمناها

طير الغلا لاشهر في همسك اندبله
قبل حدود المشاعر لا يتعداها

لاتخلي الهجر في دنياك يقنبله
شف المواصيل مظلمة ً زواياها

ماخفيت صوت الحنين اللي ترقبله
لو منك الاحزان وسط القلب شلفاها

نفسي على رضاك ماموره ومنجبله
يهزها الشوق وتجيلك من اقصاها

وتسوقني سوق عنتر في رضى عبله
لين اني اعيش معك القصه أياها

واجيك كلي غلاً ما ينقطع وبله
والقى مشاعرك مقفية ٍ مطاياها

ولو تدمع العين قالو لي ياهبله
ناس ٍ ماتدري دموعي ويش معناها

ماذاقو الهجر كلاً طايرا ً شبله
ولاحس بالجمره الا من توطاها

وان كان طعت الذي لك طبل بطبله
اللي مغازيه يامقرب أمعشاها

اقول من يطرد المقفين ياخبله
كرامة النفس جعلك من فداياها

لو عقبها ترمي السلسال والدبله
ما تطمن الروس كود لعز مولاها

يمم على ماتبي ياشرق ياقبله
واختر وش الطرقه اللي زان ممشاها

اما تروح ونقول الخير يكتبله
والا تجي وانت روح الروح ومناها

© 2024 - موقع الشعر