رفيقي

ودي أسولف والحكي يشتكيني
لني بقصر في حروفي والأبيات

لني بسولف عن وفا يحتويني
عن واحد(ن) بالقلب والعين والذات

لنه الوحيد اللي بصدق(ن) يبيني
لا ماتركني بعد ما كل شي مات

معنى الصداقة يبقى بينه وبيني
أكبر وأرقى من حروف العبارات

كل شي فيني حتى حرقة حنيني
حالف يقاسمني مع دموع لاهات

يمشي معي بدروب عمري وسنيني
لا غاب / لافارق / ولا راح لحظات

احسه اقرب من دموعي لعيني
يزيدني قربن اذا قلت له هات

مدري عرفتوا هاللي صافح يميني؟
ذاك الذي من بين ضلعينه ابات

(الضيق) ياعالم رفيقي وسجيني
الضيق ايه الضيق فيني ولامات

مدري بدون الضيق وشهي سنيني
أعرف بليا الضيق بالحيل أشتات