هواجيسي - مساعد الأصلعي

مثل نصوب الخريف تنسكب هواجيسي
على وديان ما تفوق النصب وهوجاسه

سالت وفاضت وصار انجراف وتدحيسي
سيول تغشى الوادي وتكتم انفاسه

تشيل الحصى والوطى وتفج المحابيسي
وتجعل كل سد ما يقاوي احتباسه

مثيل وديان تهامه بالرفع والتكبيسي
وديان لا انهالت وضعها على انكاسه

ما اقدر امنعها واقاوم مجراها الرئيسي
تنهل متى ما تريد لو افكاري محتاسه

اسري بالليل لشانها واشغل الفوانيسي
وتعرفني العرب لا شافو النور ومقباسه

ابني الفكره في ما يرضي احاسيسي
اطيًب الخاطر ببناها واجمل احساسه

اكًرس حالي وانا ازخرفها تكريسي
واجعل قواعدها من ذهب واترك نحاسه

ماهي بأيًات مبنى وشغلت مريسي
والا مبنى مهدد بالسقوط هين(ن) ساسه

مبنى مشدود اوزنه بالملي واقيسي
وقبل الافتتاح اراجعه واوثق قياسه

مثل قصر النبي سليمان لبلقيسي
كل الناس اتمنى تكون حراسه

الشعر ملبوس سلايلي وخير تلبيسي
لباس موروث يجمل من هو لباسه

الشعر ماهو والله هرج في قراطيسي
والا يصعب ليا حضرت له قلم وكراسه

الشعر عندي اسهل من كيل التميسي
اصرفه من بنك(ن) لا يمكن يعلن افلاسه

اطًرزه واجمًله كما حلة عريسي
او كما حًلة رئيس ضاري بالرياسه

ما اعرًضه للهوان واعرًضه للتدنيسي
من دونه روحي لا صار في مواضع دناسه

اشارك به يوم الفرح واليوم التعيسي
وفي مواقيف تتطلب علي مواقف حماسه

هو صاحبي الغالي وخير من هو جليسي
اغليه مثل الصقًار ما يغلي قرناسه

عصاه اليا بطش ماهي عصا خيسي
عصاه سيف(ن) بتار يمتنع باسه

واذا مدح يدبل المكارم فوق المقاييسي
وصدر المجلس يصير للممدوح مجلاسه

ويجعل الهمًه للجندي كما الرنتيشي
اذا شارك بالحرب والا شارك في السياسه

واليا تغزل يجيب نور ومعها لميسي
ويصبح للحب وزاره ويطرق مرواسه

واذا طلب جاته الرباع والسديسي
من عطايا الله بدون مليًا ودراسه

لكنه والله عفيف وغالي ماهو بخيسي
يطلع من راس ما يفرًط بنوماسه

ما يرضى بالذلًه ولا بالخزا والدسيسي
الشيم والسوالف والسلوم نبراسه

لا سمعته سم بالله والعن ابليسي
واشرب الكيف على هبوب الوسمي ونسناسه

© 2024 - موقع الشعر