يامل قلب ٍممتلي نصفه هموم
 والنصف الآخر به جروح ٍتتله 
 ويامل عين ٍكلما تبغي النوم
 جاها بلاها عافت النوم كله 
 يطري عليها وقت به صارت علوم
 مع صاحب ٍياجعلني فدوة له 
 ماله وصيف ومن تحداه مهزوم
 وكم عاشقٍ قبلي تعب ماوصل له 
 ياقوم لاسلهم بالأعيان ياقوم
 رمشه حفر قبر الهواوي بظله 
 له عود رويان ٍوله ساق مبروم
 وكل الرقاب من الحلا يعكفن له 
 الله ساقه لي كما سوقة غيوم
 وحوط خفوقي بالمحبه وحله 
 مايسمع العاذل ولايسمع اللوم
 وافي وأنا مثله بعد وافي لٍه 
 يمشي على ما أقول له دايم الدوم
 والموقع اللي نلتقي به يدله 
 العام ماهو يابوياسر كما اليوم
 الوقت فرق بين خل ٍوخله 
 طبع الزمن لامن غزى يشبه النوم
 الآدمي ماله جدى لوفطن له 
 الوقت ظالمني وأنا منه مظلوم
 كنه يقلب خافقي فوق مله 
 وإليا غفيت أصحى غصب تقل مفطوم
 سبة هموم بخافقي مستحله 
 وإذا غدت من كثر تفكيري تحوم
 خطرن على عقل المعنى تشله 
 طبع الفتى يمشي على طبع وسلوم
 ويصبر إذا جاله من الوقت زله 
 والآدمي ماله سوى شي مقسوم
 واللي ماهوله لوتعب ماحصل له 
 ولو ماأطلب الله وأقعد الليل وأصوم
 وأقرى كتابه صار بالعقل خله 
 يالله تجلي مابقلبي من هموم
 وترتاح عينٍ عافت الليل كله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر