كلك اسرني وجيتلك مأسور كلي بين اديك

وينك ..!؟ تغيب وغيبتك طالت على منهو يبيك
وش فيك ؟ ماحسّيت في من ذوّبه زايد حلاك

خليتني من روحتك اصبح .. وأمسي محتريك
يمّك رماني حظّي ... وحظّك على قلبي رماك

هو كيف قلبك طاوعك .. تبعد وانا اللي مفتديك
معقولة .. انّك ناسي ٍ منهو بعمره مانساك

أخطيت في حقّي .. وانا مابعت باقي مشتريك
اخطيت .. لكن ياعسى ربي يسامحك بخطاك

يامن فتنّي حسنك .. وبالزين ربّك مبتليك
الله بلاني في هواك .. وانت بي الله بلاك

ماتدري انّي مغرم ٍ بك .. هايم ٍ .. واموت فيك
واغليك .. كثر دموعي اللي هلّته عيني وراك

اشتاق لك .. واحن لك .. واخاف من نفسك عليك
حتى عيوني بالنظر ماله بمخلوق ٍ سواك

كلّك اسرني .. وجيتلك مأسور كلّي بين اديك
ولك المشاعر سلّمت .. واستسلمت لك ياملاك

كل ما ابيه بدنيتي يامن بروحي لي شريك
انّي اكون بدنيتك نجم ٍ يلالي في سماك

جيتك .. وكل اللي ابيه بجّيتي لك يوم اجيك
ان شفتني ضميان قرّب ... واروني من عذب ماك