ما يهـتـنـي بـالــرّي مـــن زنـــد غـيــره

البارحه ساهر وادير التفاكير
وان ناموا النيّام عيني سهيره

والعين كن بنونها مخلب الطير
ومن القهر صارت حياتي خطيره

أوجس بكبدي مثل دق المسامير
ويصلى عروق القلب مثل السعيره

من كثر مالاحضت بالوقت تغيير
وقت(ن) مشى بالعكس واخلف مسيره

أستفرست فيه التبوع المثابير
وفيه الدجاج الصقع يبعد مطيره

والحر ذلّ وزاومته المحاقير
وصار الثعل يمشي دروب(ن) عسيره

والغيم يقلب فيه عج ومعاصير
ولاينعرف سلك الذهب من حريره

والأنذال تفخر بالذهب والدنانير
وفهاتهم بين القبايل كبيره

مالٍ رفع سمعة رخوم(ن) مهاجير
ماتنعرف لولا الفلوس الكثيره

واليوم صارو من حساب المناعير
في ضل حكام العرب والجزيره

وياللي تعرف العلم من غير تعبير
درب المعزه لاتمشا بغيره

درب العلا شم له وجنب عن الغير
وتلقى بدرب العز خير(ن) وخيره

كسب العلا سلم الرجال المشاهير
اللي تدور للوجيه الستيره

وحضك على رزاق عوج المناقير
ولاخاب مخلوق(ن) وربي نصيره

ومن لاشرب بيديه من جمة البير
مايهتني بالري من زند غيره