ألــذّ لـــي مـــن درّ لابـهــال

أهلاً و سهلاً حيّ الامثال
اللّي معانيها مواضيح

إلها وقفنا قدر واجلال
لاجل الحفاوه بالتّفاريح

ويا مرحباً مليون بكمال
ما هبّت الشرّتا مراويح

ألذّ لي من درّ لابهال
واخنّ من عطر المنافيح

من زود ما بي حلّ بي حال
ممساي في حسره وتصبيح

لي ناظرٍ بالنّوم ما ذال
يوم الخوالي في تمتّيح

أبات جنّي فوق ميهال
ساهر وطرفي في تونّيح

حالي بهمّ وسمّ واعلال
جنّي مصوّب في المياريح

جد طاب لي من شوفكم فال
وانتو عن ادياري منازيح

واليوم جنّه سارب اللاّل
مضماه لو لمع الزّخاريح

يا صاحبي لولاك ما سال
دمعي شرى يري المناضيح

أحسّ بك لو غامض الحال
ويسدّني منك التصّريح

إشفاك وين الغصن ميّال
وين الظّبا تلهو مساريح

وين النسيم ايهبّ يوّال
وزهور ورده في تفتّيح

ويّاكم عقب الصبر من نال
منواه لو دونه مساليح

والحظ لو يرويك لامهال
لا بد عقب العطل تصليح

اسال عنك وعنّي اتسال
وعندي على هالشيّ تصحيح

لو في غبيب ومويه اهوال
أنا بكم في نبدر امريح

انته المردّ وعقد الآمال
والهزر فيكم والمرابيح

ويعل لحياب اللّي له اختال
ينقاد وبروقه مجايح

يسجي مواطي زين لجبال
ارمال وسفوح أو مطاييح

اتعشب داره عقب لمحال
ولا يستوي للبدو تنزيح

وين المها والخود تيتال
والفيج فيهن ظبية السّيح

ولي ما براه الشوق ما نال
وصلٍ يعيض النّفس ويريح