يقول ابو زيد ٍ وهـو بـراس مشـراف

يقول ابو زيد ٍ وهو براس مشراف
في تلعة ٍ بين الرّعن والذّريع

ما ارقب بها إلا واحد ٍ شاف ماعاف
مْن الدّيار اللي بها الحقّ ضِيع

ولقنب بها يقنب مع الذّيب روّاف
ما ردّ صوته بالفضا من ضليّع

كنّي بها في منزلة أهل الاعراف
لاني بها فاجر ولاني طويّع

لاني بشيخ اسلام أو لحية اوقاف
لكنني ما اسكت على الظّيم خيِع

ويشوش راسي شوش من ضيع الانصاف
من شيخ راعي لين اتفه رويِّع

اتعبت قلبي والملا خايف وخاف
بابليس يالارهاب ويّا التّشيِع

وش له ابوح الحقّ لنفوس ٍ عجاف
اللي يخاف القيْد واللي صويِّع

اطيبهم اللي نيّته أحرف القاف
امدح بحكّام ٍ وشاري وابيِّع

تسلم لي اليمنى ويسلم لي الهاف
والرّزق مكفول ٍ لعاصي وطيِّع

يا هاجسي خذني على متون عسّاف
مارد سريع ابليس عنده , سريّع!

للي لها بالقلب شيخان واحلاف
مجلس غلا بصدّره تطقّ الكويع

قلبي لها من صاد ولعين ولكاف
اوسع من الجنّات !! , ماهو وسيّع

عيني تجوع لشوف كاملْة الاوصاف
وصدري لضمّتها لهوف ٍ جويّع

هذيك لو فصل العرب قيظ ٍ وجاف
تنفخ عليه يْصير شاتي ربيِّع

عقل ٍ معه ناموس والزّين !! بالزّاف
ونعومة ٍ ماهي بحاجة تميِّع

يا زين حرف السّين لاجابته حاف
كنّه صفير البلبلي في ضويِّع

ياعلّ يفداها منيف ٍ ونوّاف
ومن هام راس العزّ إلين الكريِّع

والله ما نزّيت في راس مشراف
إلا إنّ بعد الدّار عنها يليِّع