المواقيف

صحيح من قال المراجل مواقيف
كل تميزه وقفته لا وقفها

اما تعديبه بروس المشاريف
والا يحوش المرجله من طرفها

البوم ما ينقل لك الرمح والسيف
اليا نزل في منزل الخوف يفها

ماينقله كود ابلج موقفه شيف
قرم دروب العز يرخص كلفها

قلبه عليها مثل شرابة الكيف
نفسه تعنه لايطمن شرفها

لو كان من دونه سيوف مراهيف
ياخذ مطاليبه ولا ينتصفها

مايلتف لوجيه ناس ملاقيف
لو تحذف الكلمات يمه حذفها

والرجل لولا نفعته للعرب عيف
ينعاف لا منه قصر عن هدفها

من لا يعز ربعه يعود على حيف
تلحقه شرهات السنين وعجفها

يمه بني عمه تلج التحاسيف
ناس ترومه عز واثره تلفها

وين الرجال اللي تحكم المواقيف
اللي مزامير الردي ما خلفها

لا هزها مشروع ما رددت كيف
تقضبك بالاياد وتقول شفها

اتوردك ميراد عز و تشاريف
وينومسك عند الممارات صفها

ماحطت الساقط ربوع ومواليف
ولا كبرت جرو يتابع سلفها

اللي يباريهم وفي قلبه الزيف
وان شاف له لقطه خفيفه خطفها

ما همه ان ضاع الحوير ولا شيف
اهم ما عنده يدينه يضفها

عزالله ان المرجله يالعواريف
ميراد عز يعزها من عرفها