الزمن يحفظ لنا ديوانه

الليالي تعلم العاقل ظروف ازمانه
كان الاريا عمست واشكل كبار اعقدها

ارجع التاريخ واقرى وش ورى عنوانه
لين تلقا ما يبين لك هوى ساردها

مانجيب لنا علوم ماوراها خانه
نلحق المخطي بخطاه وحجتن وردها

لين ما يبدي الصحيح ويرتكز برهانه
والخطا من فوق راس المدعي نقيدها

كم من راس ٍنفخ فيه الردى شيطانه
لين ما نفسه على غش العرب جندها

يحسبن ان العقول مفرغه وامهانه
وان ماضيت السنين ..الوقت ما قيدها

خشمه من الكبر به زنه تسوق جنانه
والنفوس الهينه حبل الحسد مقودها

كان هو من غر نفسه يدعي بايمانه
حجته لازم على روس الرجال يعدها

ما يروح بعيد كل حجه عليها ارهانه
والصحيح يصح والشاهد يبى يكدها

ثم نشوف ايهو على العالم رجح ميزانه
شوفة هلال الشهر اقوى الحجج واكدها

مير ياراع الحصان اللي طويل اعنانه
يوم جبت السالفه ما جبت لي شاهدها

بس قلبت الحقايق ما حفظت امانه
من ورى نفسك علوم خافيه ترصدها

ودك ان القصر فيدينك تهز اركانه
لين ذيك النايمه تقوم من مرقدها

كد بحثنا سرك اللي توصي بكتمانه
لين شفنا الصوره اللي فالخفا تعبدها

وش نبي من الافاعي طبعها خوانه
ترثتن تاصل ولدها من بعد والدها

وانت راس غليص لو انك تحط اديانه
قلبتك للسلم الاول ياسرع تنشدها

جدك الاول ماجا خيره على عمانه
وصل الدعوى وكبرها على سيدها

لو ما ناس تذم فيها اقمعت اعوانه
كان جات علوم فيها من المراره وادها

واحمدالله ان ثوبك الضافي طويل اردانه
والا وش يبقى على وجيه الردى سودها؟

مير رح يبقى الزمن يحفظ لنا ديوانه
كان الاريا عمست واشكل كبار اعقدها