الصدر المغلق

لا تامر الصدر المغلق وتنهاه
يلحقك من واهج ضميره عراقي

خله شوي يوصل البال لتلاه
ياخذ على راس الطويله مراقي

لعل ما يونس من الوقت يحداه
يفتح عليك من السراير رواقي

واليا فتح لك خزنة القلب بالله
عن ما يشيل القلب ويش انت لاقي

ياكثر ما فكرت واحترت وياه
ومن رحم حيرتنا تولد ضياقي

اربع سنين اسمع مباديه وارياه
واقول جعل الخير فالناس باقي

ناديت يوم ابديت باقي وصاياه
وحملت نفسي فوق ما لا يطاقي

كله لجل عهد علينا قطعناه
ولولا لزوم العهد مانيب شاقي

ولانيب تباع لمن ضاعت ارياه
ولاحب من سمت الرجال النفاقي

حلاة راع العرف من زين ممشاه
واضح يسوق المعرفه ما يساقي

واليا التلمس للمعرفه خيط بداه
يكرب على راي الصلاح الوثاقي

حنا بوقت شايل داه برداه
خادع ولا يصفي لحد بالوفاقي

ومن شر ما جانا منه بعض بلواه
وشفنا بعد بين الاخوان الشقاقي

ياناس من ياخذ علوم منقاه
من قبل لا ياقع ما ياقاه واقي

لا تامنون الوقت هذي سواياه
واخذوا على عز النفوس اتفاقي

حتى تبور اهل العلوم المغطاه
اللي تثير البغض والانشقاقي

وايضا تبور اهل النفوس المعناه
ناس لها وسط القلوب احتراقي

ومن لا وعى من درس دنياه تنعاه
ولاعاد يبقى لقصر عزه بواقي