تمـرُّد قلبٍ

مسكين يا قلبي بِحُبٍ تِوَرَّطْتْ
حُبِّ الحسانِ الحُورْ بِيضٍ رَعَابِيبْ

بَالحيلْ يا قلبي بْغرامَكْ تِعَذَّبْتْ
عشقِ الكِعابِ العذارى عِيْنٍ رَباريبْ

اللّي حَلاهِنْ كالعسلْ لو تذوَّقْتْ
اليرْتَدِين الزِّيْنْ والعِفَّهْ جَلابيبْ

مسكين يا قلبي بْشِبَاكٍ تِعَلَّقْتْ
ويا ما بْشِبَاكِ الغِيْدْ عِلْقَتْ مَحارِيبْ

يا ما نصحتكْ يا خفوقي وتِمرَّدْتْ
خالفتني وغامرتْ بشتَّى الأساليبْ

بيَّنتْ لَكْ يا قَلبْ لمَّا تِهَوِّرْتْ
اذكرْ ترى الأيامْ مثل الدواليبْ

عَذَّبْتْ روحَكْ بالهوا لِنْ تِلوَّعْتْ
بعيونْ دُعْجٍ والخدودِ المشاريبْ

ظلِّيتْ تِلْهَثْ في قِفَارٍ تِبَعَّدْتْ
تعجز عن وصولها خِيْلٍ سَرَاحِيبْ

ظلِّيتْ حَايِمْ فوق نارٍ تِخيَّرْتْ
حتى احترقت بجوفْ نارٍ لهَالِيبْ

مثل الفراشه الحايمهْ لو تِمَعَّنْتْ
تسعى لضوْ النار وتلقى الأعاجيبْ

أسْهَرْ بطولِ الليلْ وْهَمِّي تِوَسَّدْتْ
ومْزونْ عيني هلَّتْ دموعٍ مِسَاكِيبْ

وَعْدٍ سَرابِ البِيْدْ ماءٍ تِوهَّمْتْ
وشوقٍ طَفَحْ والوَجْدْ نارٍ مِشَاهِيبْ

تحرِقْ خفوقي يالغلا لو تِنهَّدْتْ
حُبَّكْ رماني في قِفارٍ مِجَادِيبْ

أقطعْ فيافي وبِيْدْ صَعْبٍ تِجَشَّمْتْ
واصبرْ كصبرِ الْبِلِّ الْعِيسِ المِطَارِيبْ

روحي سَمَتْ بالحُبْ طَارَتْ تِعَلَّتْ
تِشْمَخْ كما العِقْبانْ فوقِ الشَّناخِيبْ

رحلهْ صِعِيبَهْ بالسَّفّرْ كَمْ تِكَبَّدْتْ
قيعانْ جُرْدٍ زُودْ وسودٍ غَرابِيبْ

يا ما جَرَعْت المُرّ بْوَصْلٍ تِعَلَّلْتْ
وصْلَكْ طعامٍ للجياعِ المِسَاغِيبْ

ومزونْ حبٍّ يا حبيبي تِنَطَّرْتْ
أرقبْ مطرْهَا عسى تِهْطُلْ شَآبِيبْ

يا زينْ كَمْ ليلةٍ وحدي تِوَحَّدْتْ
أحصي الكواكبْ معْ نجومٍ مِثاقِيبْ

كَمْ ليلةٍ مَلِّيتْ بِمْلالٍ تِمَلْمَلْتْ
أرجا لُقَا المحبوبْ باجْمَلْ تِراحِيبْ

يا خِلْ يا آسِري بْقَلْبِي تِحَكَّمْتْ
أنتْ الوفا والحِسْنْ خالي المِثاليبْ

يا زينْ لَوْ زرتني ليلٍ تِأكَّدْتْ
إنِّي قَتيلَكْ يا عَدِيمَ الْعَذَارِيبْ

صَابِرْ عَ جَمْرِ البُعْد ومُرٍّ تِجَرَّعْتْ
لكنْ مَذَاقِ العِشْقْ لذَّهْ واطَايِيبْ

يوم التقينا يا حروفي تِلَعْثَمْتْ
لَحْظِ النَواظِرْ يا سِيوفٍ خَدابِيبْ

دْموعِ الفَرَحْ يا خِلْ مِنِّي تِحَدَّرْتْ
مثل المَطَرْ يا زِين سالتْ يَعَابِيبْ