ياسر القحطاني - ناصر الرياحي

الرسايل نبضها وجداني
وصلوها ياسر القحطاني

في بريده او على جواله
وصلوها له على العنواني

بلغوه انه وصل للقمه
لايخليها لواحد ثاني

وبلغوه انه مميز لعبه
ميزه في لعبه الرحماني

وبلغوه انا معه في صفه
ماسمعنا فلان والا فلاني.

ومن سألنا قال ياسر وينه ؟
الاجابه ماتبي برهاني

ناظر الملعب وناظر ياسر
وش يسوي داخل الميداني

وأسأل الدفاع وش سوابه
واسأل الحراس في البيباني

واسأل الاشباك وش مزقها
وانتظر ويجي لك البياني

باختصار تقول لك يا سائل
انه القناص بالنيراني

ابك ياسر لاعب متميز
بس هون والعن الشيطاني

ياسر الكاسر مكانه والله
برشلونه او اسي ميلاني

او مع اليوناتيد او تشلسي
اله في الدوري الاوربي شاني

غيرها لايروح يابن الشايب
في الزعيم يحصل اطمئناني

الزعيم اللي صعد بامجاده
فوق روس القوم كالسلطاني

لاسيا متسيد له مده
ماجت بزور ولا بهتاني

جات بافعال النجوم ويشهد
قاصي العربان قبل الداني

الذهب حنا هله واصحابه
كانه وراثه من الجداني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر