برواز لصورة مؤلمه

لـ عبداللطيف مبارك، ، في غير مُحدد، آخر تحديث

برواز لصورة مؤلمه - عبداللطيف مبارك

يوم بدرت الاحزان
 
جوّه القلوب كانت
 
حباتها خوف .. صاحى
 
يكنز حقيقة رعبها
 
ويلفها...
 
توب السكوت
 
يوم بدرت الاحزان
 
كان...
 
شاهد أخيرعلى قبر
 
عنوان..
 
بموت إنسان
 
* * *
 
صمتك ملوش صوره
 
بلا ملامح تترسم
 
او شكل..اوعنوان
 
رضيت تموت مجهول
 
رغم إنك إنت ف الخفا
 
كنت العلن
 
رغم إن قلبك فى البرية
 
ساع ..وطن
 
رغم أن عمرك كان لحق
 
وكان
 
تمن
 
* * *
 
رضيت تموت مجهول
 
زى ضىّ المجد ..لما ينطفى
 
زى ومضة روح..بتيجى
 
وتختفى
 
زى حلم جميل
 
رضيت تموت مجهول
 
* * *
البيوت فارقت خطاها
 
البيبان سانده على جدارن
 
بكاها
 
والشوارع دبلت
 
جالها ليل مزمن على هيئة سفر
 
معشقش نجمه مزهزهة
 
ولا صار غناوية القمر
 
يحكى ف أخر نبضة قلبك
 
حسها
 
وباسمها
 
كان يعلن الترحال
 
* * *
الوشوش مرت كحلم
 
طبعت ملامحها بدم
 
فوق لوحة تعتب ع العيون
 
إللى بتشهد نحرها
 
وف سرها
 
مكنتش هيه الملهمة
 
برواز
 
لصورة مؤلمه
© 2023 - موقع الشعر