ذعذع الغربي وجانا في براده
والعلوم الطيبه قدر وفضيله

للفخر عاده وللماجوب عاده
والكرم راعيه ماينسى جميله

يافهد هاك الجواب اللي وكاده
يحتضن وجه النصر دون الفشيله

العلوم جزال والدنيا إف اده
والتجارب علمتنا كل حيله

والوفاء لرضاه كم نكسب شهاده
والعمر لابد مايثمر حصيله

والمواقف ليلٍ اشهب من سواده
والفعل دايم مثل قدح الفتيله

من كسب في ضيعة الدنيا عباده
بشروه ان الهدف راس الوسيله

والشرف والدين يحتاج الإشاده
والتواضع رمز للنفس الجميله

والمراجل مثل من يقدح زناده
والردى ساسه من الساس الهزيله

والرخامه لالحاف ولا وساده
والبخل من يعبده شاف الرذيله

للذنوب اشكال والذنب اعتماده
يتبعه توبات او ظلمه طويله

وقوة الفارس ترى قوة جواده
لاحدى خشم الزمن يا القرم ميله

والليالي كم تبي عزم وجلاده
والصبر يبقى له اعمالن جليله

والرجل يختار موقفه با اراده
وكل برقن مالقى منهو يخيله

والنفل والشيح يفرق عن عراده
والسهوم الساطيه ماهي بخيله

مايعيش اللي ربت فيه الشراده
ومايضيق اللي يساوي له قبيله

والطيور الفاهمه تبغى ركاده
وفرق بين الحر الاشقر مع بديله

والقنص هو مكسب القلب ومراده
والحباري شوفها يبري عليله

جهز اللي جاهزن يرقى حماده
في طرف خدن بنومس من يجيله

موترن صاغوه واثنوا في عداده
وارتفع خشمه وسند للطويله

باغين حزمن تطايربه جراده
فيه يلقى صافي النيه مقيله

جيب لكزس كملوا شكله زياده
الرفارف والتواير تنثني له

لاعرض جنبه كما بيتن عماده
مدهلن للجوخ وسيوفن صقيله

وان تقفيته كما حلمن سهاده
غفوتن في نعمة الخلد النفيله

يزبن اللي ماتبنته القراده
كاسبن قولة نعم في كل ليله

لا اظلم الليل المقفي في هجاده
ماينام ويفتخر به كل جيله

والجمل للحمل كم نوخ شداده
يوم خطو اللاش يومي به شليله

فارسن من هيبته قوة عناده
فارس ومطنوخ والفزعه دليله

الشرف كاسيه من لحظه مهاده
في مواجيبه من اوصافن نبيله

في زمان الحرب يا مااطيب جهاده
وفي زمان السلم كم يفخر خليله

ناصر ال شافي لياعديت ساده
لااحتمى الميقاف كم ينجي دخيله

راس قومن فيه للعليا قياده
والمراجل مكسبه راعي الكحيله

تشتعل ناره ولا تصبح رماده
وفوق ناره يشتعل براد هيله

ووسط ديوانه تفرعن باالرياده
لين حققها بعاداتن خصيله

يستحق المدح والمعروف زاده
وافتخر به واقترب يمه واجيله

وارسم البسمه واردد باالاعاده
لين توصله علومي وتعني له

والظفر خزنه وشيخ المجد قاده
يرتكي للطيب دايم يرتكي له

ولارجعنا للسلوم بكل ماده
كاسبين النور ماحشنا ظليله

من بني هاجر زعيمين السياده
با القبايل فعلنا معروف طيله

حافظين العهد لايوم الاباده
والنخل لومات له جذر وفسيله

في زمان الموت سيف العز صاده
كم عدون راح يشكي من مليله

وكم زرعنا با الكرم جودن حصاده
وكم رقبنا بارقن يبرق بسيله

وكم وفينا في زمن كله نكاده
وكم عطينا في زمن مافيه عيله

وكم رحمنا من تولته الرباده
وكم عطفنا با الظروف المستحيله

وكم سندنا من بغانا في سناده
وكم وقفنا فا المواقيف العضيله

والزمن سيفن مخلد في غماده
لاشهر في وجه من جاله ياويله

والحريم انواع بستانه وغاده
والزمن به ناس عقل وبه هبيله

والزواج العذب هو راس السعاده
والطلاق أقشر وتاليه الهميله

والمشاعر لو تحلت بالقلاده
تدمح أعذاري وأنا أفراحي قتيله

سامح الله صاحبن ضيع بلاده
مالقى ياكود توديع الاصيله

كيف مايرحم خفوقي من قياده
كيف مايرضى ويقنع عن رحيله

عزتي بالطيب ماتبغي إجاده
والعواطف ماتروح وتشتكي له

الفراق اصبح ويصحب له وكاده
ولا أعده لي مشاعر أو وسيله

ياشموخي شف غلاه اصبح عياده
محتواها جرحي اللي طال ليله

يوم جاه اثبات حزني من وداده
وذاق قسوة من تفارق مع حليله

مال جرحي با الزمن غير الضماده
والنفوس الغاليه تبقى ثقيله

دام صمت الليل بين با انسداده
وألهم الخاطر وغربلني هديله

با احتفل با اسم الوفاء مجدن سناده
من عذاب ضلوع ودموعن هميله

الجروح ارحم وحبي وانفراده
تاليته فراقٍ يجره بذيله

سيف وقتي لاشهرته في حياده
مارحم خد الهوى واشفى غليله

كم رفيقن با الزمن شفت ابتعاده
وكم ودعان لاتمنيته اجي له

ماخبرت ان العمر فيه انحياده
للفراق اللي يناديني صهيله

كان ودك تقتنع هاك استفاده
سيفنا يلمع ليا شفنا صليله

فدوتك ماشال حبي مع عداده
يوم فوق انغام حزني قلت قيله

وليلي المشبوه عذبني سداده
كم جرحني لين ما زاد بهطيله

ويل بوحي لاغشاني با ارتداده
خالط همومي وقام ارسل بسيله

اركب الهاجس وأنوخ من شداده
لين اهيم بغبته من فوق خيله

يوم عمري كان في صحوة رشاده
ودي اجر المعاند لين ازيله

الجفا له راس يا ماثقل جماده
يشبه الصلبوخ في لحظة مهيله

للجروح اشواك تشبه للكداده
تطعن بصدري وكل جرحن تهيله

والمدامع والسهر دوم ازدياده
يعلن مفارق عميلن مع عميله

وراسي اللي مايقند به قناده
كود بنن لاحضر شري يزيله

والوفاء يرقى ويا ما احلى اتحاده
والخطا هو طبع لقلوبن هبيله

من جحد معروف يلقى من جحاده
ومن صنع معروف يجزى به مثيله

ما اشتكى الملهوف لو ها الحب باده
ولا انتهى عزم المراجل ياجهيله

مطمعي يم الشموخ وعزمي جاده
يوم غيري غرته عينن كحيله

شف غلاي اللي ترعرع في فؤاده
يوم ابيع الخلق من خاطر سبيله

وانتشال الصبر لو يغني زهاده
شال حلمن طاح وركونه ذليله

ماتوفق صاحبن همه قعاده
والعزيزاللي مقامه يحتمي له

يوم شفت البحر في لحظة هياده
راكدن والموج به ربي وكيله

ياحلا ريح النفل مع ريح كاده
صاحبن قلبي بطيبه يدعي له

لا لمحت الغيم وارسل من رعاده
وشفت با القاع المطر لحظة مسيله

والعرب كلن تعزوا في جياده
واشملوا كلن يسولف مع زميله

تسمع لقلبي صدى ما اطيب رداده
وتفهم احساسي وتقرب تنحني له

ومن حسد يلقى المصيبه من حساده
وعزتي لنفوس با الدنيا خبيله

في زمان الموت شرن مع نقاده
والحسود بصحوته تسمع طبيله

لو نظرت الكون في واسع مداده
غير ربك ماحدن يقدر يزيله

والحديد اللي يشيل من الصداده
شوف به ضرب المطارق كم يميله

وازهم اللي خان في وقته وناده
الردي صدام وش تالي فعيله

كم تهزى بوش به ويا نداده
وضيع بلاده وشعبه والفصيله

ضيع بلاده واخلف في وعاده
ولابه عراقي يعز ويفتدي له

وقبره الليله ترى بقاعن صلاده
من رحل ماله جماعه تعتزي له

والقدر قفا بحكام وقياده
زايد الغالي وعيسى من مثيله

والفهد هو بسمة الطيب وعياده
وشيخنا جابر عسى الجنه تشيله

يوم خطو اللاش يفخر في رقاده
كم نجي حوض المنايا ونعدي له

لين كلن يهتني بنعمة رغاده
ولين كلن له مقامن يستوي له

ثم تشوف اللي يحامي عن ذياده
محتمي صافي لبنه اللي بصميله

والشرف والعز كم نعشق صياده
والتميز مجدنا كم ينتمي له

والفخر والطيب هو راس السياده
والردى هو راس مالن للفشيله

والصبر يبقى مع الايام عاده
والعمر يمضي ترى بيومن وليله


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر