حبّ البدو - وصل العطياني

قالوا علامك قلت مهموم مهموم
همّ(ن) يهد الحيل هد الجبالي

محرمني الراحة ومحرمني النوم
أشغلت بالي حيل وأتعبت حالي

أعد فالأيام يومٍ بعد يوم
وأجلس وحيد أحسب نجوم الليالي

ون نمت تدخلني هواجيس وحلوم
المر منها مر والحلو حالي

وليا بقيت بمثل هالحال؟ ياقوووم
لا والله الا أبى أغدي براسمالي

لكن مابه شي فالكون بيدوم
مادايم الا الله عزيز الجلالي

خلوني أنسى الهم والغم والشوم
وعلى بحور الشعر أورّد حبالي

أنزل لسوق الشعر وأزوّد السوم
وأدور الغالي ولو كان غالي

واغوص في بحر المحبين واعوم
ليا ذكرته كن يرتاح بالي

الهم كله كوم والحب في كوم
علة تخلّي الكبد كبر الطحالي

الحب ذبّح له صناديد وقروم
لن عشت وإلا متّ ماني لحالي

لكن هذا ظرف بالشمع مختوم
كاتب عليه لمن تهمه حوالي

عليه صورة قلب بالدمع مرسوم
دمعٍ حمر يشبه لدم الغزالي

وبداخله عنبر وكادي ويشموم
وحبّ وعواطف مالها اول وتالي

ومعها السلام اللي على قنّ وسلوم
ينصاك ياللي ما تفارق خيالي

سكنت في قلبي معزّز ومحشوم
عالي عن العربان والقدر عالي

صلّحت لك فالقلب فيلاّ وبدروم
والبيت بعد البني صعب الزوالي

ملزوم اغني فيك ملزو ملزوم
غيرك يبى لكن يا هملالي

تتعب بيوت المدح وتطيح وتقوم
لجل عيونك يا حسين الدلالي

وحبّ البدو مابه عذاريب وثلوم
مابيننا كلمة تعال وتعالي

وليا هرج فيّه مساكين ورخوم
ما هرجهم واصل مواطي نعالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر