سكون الليل - محمد الدبيس

بليله ممطره مرّت على بالي حلو ذكراك
بعد ما نام من حولي من العربان يالغالي

وهلّيت الدموع اللي ملت عيني عقب فرقاك
عقب فرقاك من حزني سقيمٍ ماتبي حالي

مطر هامل علينا يا بو مفلح ياعساهو جاك
يرشّك يا قبر هالليل كله للنّدا التالي

سكون الليل موحش يا بو مفلح قاسي بليّاك
يضيّق خاطري ليلٍ سهرته جالس لحالي

قصيدي لو كتبت الفين بيتٍ ما قدر يرثاك
وجفني ما قدر يرثيك لو الدمع همّالي

سنين اطوال يا سيد الحبايب ما قدرت اسلاك
وغيرك ياكثر منهو يغيب ولا شغل بالي

يضيق الكون فيني لا سمعت بصوتهم طرياك
واهرَجهم وانا من ضيق بالي ماني بخالي

لو ان الموت يقبل بالفدا كل العمر يفداك
لا شك أَقدار وأحمد خالقي في كل الاحوالي

عسى الله يا بو مفلح بالجنان الخالده يجزاك
طلبت اللي رفع سبعه وعرشه فوقهن عالي

عسى في جنّة الفردوس ربي يجعله مثواك
رجيت القادر اللي فيه ابد ما خابت آمالي

© 2022 - موقع الشعر