فكرت فيك.. يا دنيا - محمد الدبيس

فكّرت في حالك يا دنيا.. وفكري
ازرا يميّز ميلتك من عدالك

والغبن منّك مبتحل فيه صبري
لو شفت شينك مهتويني جمالك

وادري بك انتي زايله مثل عمري
وبرغم هذا يهتويني دلالك

تخطين في حقّي واسامحك.. وادري
عن حال منهو طاب ماسال حالك

مشيت في حكمك على درب جبري
وانجاني ربّي من يقين المهالك

يعجز عن المعبود حمدي وشكري
واقول فال الله ولا يوم فالك

لو كان حبي لك عظيمٍ وعذري
حبّي لربّي يسوى درّك.. ومالك

© 2023 - موقع الشعر