قصر الحب - ماجد الرشدان

وش بقالي دام أنا حبك خسرته
ما بقى من رحت شي أبكي عشانه

ليّه قلبٍ طاح في حبك وأسرته
بعد ودّه يومه أغرقك بحنانه

يذكرك في كل لحظه ما ذكرته
ما تذكرت الغرام وكبر شانه

أشهد أن قلبٍ تولع بك دمرته
صرت له أكبر عذابه في زمانه

كنت أظنك من وفا الحب اعتبرته
في يدينك حافظه مثل الأمانه

يعني وش تخسر لو بحبك غمرته
واحتويته حب في صدرك مكانه

وقصر حبٍ داخل ضلوعك عمرته
وأحتفظ بك هو لقصر الحب دانه

لكن اللي في هواك أخلص دمرته
والوفا والصدق جازيته خيانه

من كثر ما عنه صدّيت وهجرته
حطّم الهجران بالهاجر كيانه

لين قلبه بين أصابيعك مسرته
كسر عساف الهجن للخيزرانه

ورغم كسره منك ما جيت وجبرته
ألا زدت الكسر الأَول كسر أهانه

ف ليلك الحالك قبر حبه حفرته
كره منك والا في طبعك لعانه

لا حملت اللي قتلت ولا قبرته
فيه ما راعيت عرف ولا ديانه

ومن بعد هذا وش اللي ما خسرته
ما بقى من رحت شي أبكي عشانه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر