علاقة عابره

الشعر عشب ٍ مخضر ٍ ماهو مثل شوك الخريف
فيه الخزامى والنفل عطر ٍ تميّز بالترف

وأنا حضرت بجعبتي بيت ٍ على المعنى يضيف
إن الشعر نهر ٍ جرى والكل منّه يغترف

عبره سألنا للبعض كيف الرجل عقله خفيف
لاشاف رمش ٍ يتبعه ضايع وقلبه منجرف

لوهي علاقه عابره ضيّع مع الجنس اللطيف
شبابنا بعضه ترى كنّه وصل سن الخرف

وثوب الحميّه ابيض ٍ واليوم ماعاده نظيف
والبعض قلّت غيرته قام يتهاون بالشرف

سلام ياوقت ٍ مضى فيه الأوادم ماتحيف
أهله نزيهه وافيه على الحميّه تنعرف

إن مرّهم شخص ٍ ردي لوهو مفّتح كالكفيف
ماله مكان ٍ بينهم من ذنّبه اللي يقترف

وراع الردى عاش الردى عقله تبيّن به خفيف
قوم ٍ تهيم بغيّها عملة ردى ماتنصرف

وراع السفالة ضايع ٍ في دنيته ماهو عفيف
وحل الخناء منّه جنى المنذله والا القرف