بنت الأصول اللي على الدين شبت

بنت الأصول اللي على الدين شبت..
تشيب ماوطت لغير الله الراس!!

انحبت .... ومثل المخاليق حبت..
ماهي قليلة حظ .. "لكن من الناس"

البارحه ريح المقادير هبت..
وضاقت على وسع الفضا ذيك الانفاس!!

دعى الفراق وجمرة البعد لبت..
والحزن واقف والشقا دق الاجراس!!

ياخيبة اللي بين الاضلاع ربت..
حلم جميل ومات في لحظة انعاس!!

أقسى شعور : "يكون قلبك مثبت"
وتزلزله )صدمة( وهو حيل >حساس<

كذا تكون اللي بكت واستخبت..
تبي تلم الجرح..جابت له الفاس!!

لكن مع هذا .. اصمدت واستحبت..
تكون أكبر من عنا الجرح والياس!!

"طاحت قويه" والظروف استتبت..
"وقامت قويه" وادمحت غلطة الباس!!

كذا تكون "اللي على الدين شبت"
تموت ... ما وطت لغير الله الراس!!