سواليف المطر - أميرة الجابري

على طاري سواليف المطر والبدو والراعي
على طاري صباح الخير والبرد وميادينك

على طاري سنين البعد والفرقى ومرباعي
سنينك كيف تقضيها وش مسوي مع سنينك

تذكر يوم قلت أن الفراق بيلوي ذراعي
وأنا طمنتك وقلت انتلاقي في عناوينك

تفارقنا وتلاقينا سعينا والهوى ساعي
وما خليت لي شي أستبيحك فيه وآدنيك

لا تحكي لي عن أوجاعك ولا بحكي عن أوجاعي
لا تسألني عن غيابي وأنا ما قلت لك وينك

ترى أوضاعك هي أوضاعك وأوضاعي هي أوضاعي
مدام قلوبنا وحدة بتذكرني شرايينك

وإذا ودعتك ورحت بطريقي تعرف أطباعي
أكيد بتلتقي بعد الفراق أيدي مع يدينك

فلا تعتب على قلبن صرخ من داخل أضلاعي
ولا تشره على عيني تراها بيني وبينك

على كثر الدموع اللي أذرفت عينك على وداعي
تحير الدمعة بعيني .. وتدعي ربي يعينك

أنا ببكي على فراقك ولكن ما لها داعي
أخاف ان طاحت دموعي تطيح الناس من عينك

© 2024 - موقع الشعر