كيف / يمكن / ليت / لو / ياعل - مشعل الشايقي

فؤادي لاوصل علم القوي شد الضلوع
اقضب اوساط المحاني والصبر يفرج مصيبه

اجلد بصدري يا قلبي لا تجي طفقٍ جزوع
خفقتك لا لا تراعد لا عوا للهم ذيبه

لا تعدى لا توايق لا تدور لك فزوع
ازبن طويق الحنايا بندق الشكوى صويبه

وانتظر صبحٍ دروبه ما تجي وادي الدموع
المساري في غداري الروح تجعلها عطيبه

كيف / يمكن / ليت / لو/ ياعل / ماتبري وجوع
والتمني درب ضيق ما وصل ديره رحيبه

من ينام السبت فكره ينتظر صبح الربوع
تثقل الساعة ويعيش اليوم.. لحظاتٍ عصيبه

لايهمك يافؤادي لوتجي همومك جموع
دامك معلق بعقلٍ عاشر عقولٍ لبيبه

النخل ماقد بخل لو ماهزع يوم الجذوع
وش يفيد اصبح جريد الذنب ما جمت قليبه

ذا الزمن حب المظاهر والتفاخر والطلوع
كم رجل ذب المبادي من اجل شيٍ يجيبه

والمواقف نعمة الله والمآسي اللي تروع
تظهر العزوة من الخزوه نتايجها رهيبه

في المصالح عونك اللي لا امرته جاك طوع
لا خلص فرعون يطعن بالظهر نمه وغيبه

مثل من صلى لحاجه بعدها كب الركوع
أيتمسكن لا تمكن اختلف طبعه و طيبه

والدني مهما تطبع تكشف الحاجة طبوع
للجيف ينزل من اعلا ماخشا شيٍ يعيبه

لا كلا غمض عيونه كنه القط الدنوع
نفسي نفسي لا كلا ضرسٍ علا ينسى صحيبه

يجمع المال ويصره .. ماهو من فقرٍ وجوع
حب لدنيا مايسمح لو صبغ شعره مشيبه

للخوي طلعت ريال اصعب يجي من حب كوع
كنها الروح اللي تظهر ياعسى ماله النهيبه

وهذا حال الخلق احدن شمعدان احدن شموع
ذا برود إحساس وهذا واقد إحساسه لهيبه

والعمر/ قفرا/ مطر/ مابه مقر/ مابه رجوع
من المهد/ حتى اللحد/ شايب ولد/ يدفع ضريبه

وياشقا اللي في هواء روحه يجي دايم تبوع
ان ركض ولا وقف يلهث و روحه مستصيبه

والسعيد اللي عفيف الروح بالدنيا قنوع
مرجهن قلبه بربه مادى بأعظم مصيبه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر