غياب

للذاكرة لمي شتات احتمالي
من نبرة طاحت على صدر بابك

بسهادها نادت عيونك تعالي
واستلهمت عطر الوعد من ثيابك

تمرجحت بيني وبيني ليالي
ضعف يتوسل عنفوان ارتيابك

انفاسها تحيي هشيم انفعالي
وترسم ملامح للشفق من خضابك

وشلون اسافر في سكوتك لحالي
وصوتك يوطن حيرتي في رحابك

كيف اهتدي وانتي حكاية ضلالي
جنونها حرف غرق في سرابك

مثل الظنون الخالدة في سؤالي
تتوه في عتمة معاني جوابك

للدمع لقيود السهر لارتحالي
للبوح للحزن العنيف لعذابك

لكل الدروب اللي ظماها ف بالي
لحلم الغصون اللي خذلها سحابك

تنفي تفاصيل الصبر عن خيالي
وتشعل مواويل المدى من غيابك