تلعبـــي الهــقـــوه ..

ياعيون خلي وش بقى عاد تبغين؟؟
لاصار شلتي مابقلبي بعيونك

كان المناظر دونها لاتخلين
اطارها يعزف علينا لحونك

والله لاكتب فيك وانتي تشوفين
ابيات شعرٍ من ضميري تصونك

سال القلم من طلتك يوم تلفين
القاف عندي والمشاعر سكونك

حطيتي لثامك على الخد نصين
ياقووووووم ... يا خطو المزايين دونك

براق خدك شعشع الشال نورين
لاتقول وشلونك؟ اذا طاب لونك

ولاتقضم الناجد على التوت يازين
من مبسمك تخشى الشفايف سنونك

الزين عندك وانت ماتطلق الزين
الله يعينه وانت ربي بعونك

تدري لو انك دجت بين البساتن؟؟
الورد يذبل وانت تمشي بهونك

وش طلعت الرمان والخوخ والتين؟
استدرجيني في مقادع صحونك

فلي شعرك اللي تقل حال مسكين
لاطاح ماتاقاه هيبت متونك

وريان عودك لانثى قال تكفين
خفي على.. وش دخلن في شئونك؟؟

وتسبق خطاك من الغنج يوم تمشين
ذرعانك اللي تبتلش في ردونك

اشقيتني في ما ارى يا ادعج العين
يالمهرة اللي ماقضبنا رسونك

لاقالت محمد .. تباشرت باهلين
لبيه.. انا وارسي على ضفاف جونك

الله يحفضك يالغضي قولوا : آمين
وارجوك ردي ماسرقتي بعيونك

تلعبي الهقوه وانا وين لا وين؟؟
عساي انا ماني مخيّب ضنونك