نفس المسافه - حمد بن فطيس

افرح الى قدّمت للناس معروف
ولا ني بمتلي ما فعلته حسافه

ادري به انه في هل العرف مخلوف
والاّ كثير الناس ما فيه طافه

ماني بتبع امعاسم الراي مكلوف
لاشك تاخذني عليه المرافه

عرفي مع اهل المعرفه صب مسقوف
احد ٍ سمع واحد ٍ بعينيه شافه

ولاني على الشهره حريص ٍ وملهوف
باب الغرور اعاف شكله واعافه

ولا شوف لي فرق ٍ ولا اشوف لي نوف
الاّ على اهل اللصمقه والسخافه

بالعرف و اسلوم المناعير مكتوف
احرص على الخوّه بليا كلافه

لاتبع رضا (مي ٍ )ولا اتبع هوى (نوف )
قرب السرابه بعد.. نفس المسافه

وبعدي عن النمام واطلاقة الشوف
اخير من هرج الخبل والتفافه

والى اعترض لي في المخاليق ملقوف
اعلمّه وشلون ترك اللقافه

واعلمّه فرق البريسم عن الصوف
وعن شين زلات القدم وانحرافه

قلته وانا اعرف الشعر هرج مصفوف
تغني سمانه ..ويش لي في ضعافه

ماهي بيوت مكسّره من غثا جوف
من قل رس ٍ ما نفع به غرافه

ماني بااتابع بالغنى (جورج وسّوف)
نفس العفيف اتكز به من عفافه

الشعر مايقبل من الحل منصوف
من فاقد الشي ..تاخذ الشي..خرافه

كان الشعر عوّد مقالات وحروف
كل ٍ غدا شاعر ونجم استضافه

وكانه رجع رزّه مع شماغ منسوف
وش ينبغى بالشعر والقصد تافه

احسن نخلي منهج الشعر بالكوف
ان كان ما نقدر نعدل انجرافه

دام الشعر بالفديو اكليب مشغوف
هذا التصور فاق ظني وطافه

افه وجت تهريب في بطن ملفوف
وكل افة ٍ تلقى من الله آفه

يوم الظليم يخش راسه من الخوف
الكل شافه يوم بادل خفافه

والطير لو به بعض الامواس منتوف
لا بد ما تبدي عليه النحافه

وتطابق الاشعار من شخص معروف
دليله انه ماكتب له اضافه

احوف شعري عن مناقيدهم حوف
يقرى بنجد وينقري بالرصافه

وان لافني هاجوس بعض العرب لوف
يخافني ماهو بانا اللي اخافه

لنّي من اللي حازت المجد بسيوف
لابان باطراف الضعيف ارتجافه

في ظل شيخ ٍ ملتجى ايتام وضعوف
شيخ ٍ يلين اله الصعب في وقافه

المجد لو له جسم بيدين وكتوف
لقيت ابو مشعل تعلا كتافه

بحماه تلقى الصعب طايع ومعسوف
يطيع لو ماهو يعرف العسافه

لاوامره نسمع وبارائه نشوف
بارض ٍ تميّز شعبها بإتلافه

ارضي قطر واسم قطر وابل قنوف
اسم ٍ لها من قبل عصر الخلافه

وبحر ٍ حضنها في محانيه بكفوف
سلام.. يابحر الخليج وضفافه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر