الوفا لكم

ابطيت وانته تستحق اعتذاري
بالكاين اللي في كياني تكونت

دارى وكنى عنك مانى بداري
والا ليمديني بهمك تجننت

مادام يسبح في مدارك مداري
انت تعرفني زين وانا اعرف من انت

ما ارضى انكسارك لو بيون انكساري
لا هنت يا شاكي من الغبن لاهنت

جيتك مطر من بعد طول انتظاري
وغنيت منك اعذب حروفي وهيجنت

ابشرك ماعاد للبعد طاري
ذكرت ربي واستخرته وهونت

حددت من كثر التجارب مساري
شفت الدروب يمين ويسار وايمنت

عزيت نفسي لجل رد اعتباري
اكون والا جعلني يوم ماكنت

مليت اجامل واتصبر واراري
يخون غيري والا انا اموت ماخنت

ايه بدوى واعشق حياة الصحاري
حتى لو انى في المدينه تمدنت

طبعي على كسب النواميس ضاري
لو كثرت همومي مع الوقت مالنت

اليا نصرت الله عليه انتصاري
وان شانوا اصحابي للاصحاب ماشنت

احضر واغيب برغبتي واختياري
ولا انتظر صح الله لسانك احسنت

والله لو انه بالقصيد افتخاري
لا اقول انا اللي فوق عرشه تسلطنت

انا حسابي مع هل العرف جاري
ماقد تسلفته ولا قد تدينت

اليا نزلت بسوق بايع وشاري
الحمد لله ماغدالي ولا سنت

والشعر له كاتب وناقد وقاري
وانا لو ادور رضاهم تمكنت

كم شاعر ببيوت شعره يماري
وانا ليا شفته يغنى تحنحنت

وكم شاعر حرفه من الفكر عاري
اقصى طموحه ماتعدى هوى بنت

هذا قرار الشعر ماهو قراري
شعري مشاعر صادقه ماتلونت

اخذت عبره من حديث البخاري
قل خيرا أو اصمت وانا بذلك امنت