.. رسيت بشاطي الراحه وقلبي مارضى يرتاح ..

رِسِيتْ بشَاطِيَ الرَاحَه وقَلبي مارضى يِرتَاحْ
هُمُوم ٍ ذِكْرَهَا خَلّا وَرِيْدِي مَا عَرَفْ رَاحَهْ

هُمُوم ٍمِثْل مُوْجَهْ قَاسِيَهْ جَارَت عَلَى مَلّاحْ
نِسَى مِنْ طيشَهَا نَاسَهْ وغِيْدَ الحَيْ ومْلاحَهْ

يُهَانْ الحُرْ والبَاز ودَمْاهُمْ فِي الترَابْ يسَاحْ
وأشُوف الطيرْ يِتْنَمّرْ كَأنّه سَيّد السَاحَهْ

وأشُوف القَافِيَهْ لأهْلِ المَصَالِحْ والطٌبُولِ تْبَاحْ
كَأنْ مَا لِلْعَرَبْ بَحْر وفُرَات ومَسْجِد وبَاحَهْ

أحَدْ بِيْدينَهْ الخَزْنَهْ .. وأحَدْ بِيْدينَهْ المفْتَاحْ
سَعَدْ غَارِقْ في لَذّاتَهْ .. سَعِيدْ الصّبْر مفْتَاحَهْ

دُرُوب القَافِلَهْ ضَاعَتْ ولا النَجْم الشِّمَالِي لاحْ
وفي ذُل السَرَاب يدوّر الضَمْيَان عَالوَاحَهْ

ودَاخِلْ أضْلُعِي عَبْرَةْ مُحَارِبْ قَال لِي يَاصَاحْ
صَحَتْ كُل الأمَمْ الا الخِيَار وقُلت لصْيَاحَهْ

متى نَحْرِثْ عَزَايمْنَا مثِل مَا يَحْرِثِ الفَلاحْ
ونَحْفرْ بِير عِزّتْنَا بَايَادِي قومْ فَلاحَهْ

بذٌور المَجْد نَرْوِيها ونَجْنِي الوَردْ والتّفاحْ
وتتوحّدْ ضَمَايِرْنَا ورِيْحَ النَصرْ فَوَّاحَهْ

وأنَا مَانِي بِارهَابِيْ ولوْ جار العَدِل أو راحْ
ومَا غَيّّّّّّّّّّّّّّّّّّر قَنَاعَاتِيْ سَحَاب الظُلمْ ورياحَهْ

قَصِيدِيْ مَايِجَامِلْنِيْ ولوْ كلّي ألمْ وجْراحْ
أدَارِيْ بَهْ وأدَاوِيْ بَهْ زَمَان ٍمَاْ كْثَرِ جْرَاحَهْ

وتِكْبَرْ فِيْ حَنَايَانَا مَحَبَّة بَدْرنَا الوضَّاحْ
رَسُوْل(ن) ٍ نَوّرِ العَالَمْ بِإعْجَازَهْ وإيضاحَهْ

مُحَمّدْ مَصْدَر العِزّهْ مُحَمَّدْ بَلْسَمِ الأرْواحْ
مُحَمَّدْ اسمه بقلبي شبيه النقش بالرَاحَهْ