كـــذبــة غـيــابـي - خلف الكريع

سل عن عدوّي ولا تسأل عن احبابي
ما تعرف الرجل حتى تعرف اعداءه !!

لولا ( الردى ) ما عرفت ( الطيب ) باصحابي
و ( العلم ) لولا ( الجهل ) ما شاعت اصداءه

يا ناشد عيون خلق الله عن شهابي
لوما السما مظلمه .. ما بانت اضواءه

وانا مع الناس .. لا اجامل ، ولا احابي
ولاني من اللي بحكمه يتبع اهواءه

بعثرت كل القيم في فهرس كتابي
شاعر : يرتّب زمن .. لا بعثر آراءه !!

بحضور صدقي .. قدرت اكذّب غيابي
يا سيّدي .. والمطر يلغي العطش ماءه

يا عم .. فض العتب .. ما ينفع عتابي
ماني ( خلف ) لا استبحت الذنب واغراءه

كيف اتسوّل بشعري واطعم انيابي
هو فيه رجل ٍ يجوع .. و ياكل اشلاءه !!

لو زرت جدران ذاكرتي ومحرابي
والضيق لا حاصر انفاسي بخيلاءه

ولو سولف الدفتر الغافي بدولابي
عن طفل يا ما انحرم من أجمل أشياءه

ولو سولف الشعر لك عن حرقة اعصابي
لا سافرت بي طقوسه .. لآخر اجواءه

ما لمتني يوم اشرّع لاجله ابوابي
واصْدق معه .. واصْدقَه .. واصدّق ايحاءه

تيّممي يا هموم الناس بترابي
كل ٍ بشعري لقى كفّارة اخطاءه !!

وكل ٍ لقى له محل بجملة اعرابي
والحزن : انا ، لو تعدّد فيكم اسماءه !!

فتّشت عنّي / لقيت الناس تحيا بي
كُل ٍ – ولكن – تخلّت عنّه اجزاءه !!

راحوا ( بغاياتي ) .. وخلّوا لي ( اسبابي )
مثل : الجمل – لا عقروه – وزادوا اعباءه !!

وفتّشتني / وما لقيت الآي بثيابي !!
وعالم طفولي : هدوءه ( سر ) ضوضاءه !!

الله يسامح زماني ويش سوّا بي ؟؟
ضيّع قوافل طموحي وسط بيداءه

كن الجروح : استجارت تحت جلبابي
وكن العنا : كوكب ٍ واضلاعي ارجاءه

وكن السهر : خيمة ٍ واطنابها / اهدابي !!
وكن القمر : دمعة ٍ منّي وإمضاءه !!

وكن القصايد : وطن تجتاحه اسرابي
لا هاجرت من ( بلاد الخوف ) لانحاءه

وكنّي : مدينة .. سكنها شيخ ٍ اعرابي
نوّخ مطاياه عقب الشيب واعياءه

ناس المُدن ( كافره ) ، والشيخ ( وهّابي )
هَديَه من الشرع ، وسلومه من اباءه

الناس من لحيته – تعتبره – ارهابي !!
والشيخ ما يامن الفتنه على ابناءه !!

يا عم صعب اخذل قلوبٍ تهقوى بي
ووجيه مغسولة ٍ بالما ووضّاءه

أحرقت باحلى الأماني لاجل يدفابي
شعب ٍ رياح الشتا تقتات باحياءه

رافعت باسمى القضايا وكانت اتعابي
قلب ٍ ذكرني بسراءه وضراءه

يكفيني ان حسّوا ان غيابي ابطابي
تزورني طيوفهم ثكلى ومستاءه

ويكفيهم ان جيت صارت كذبة غيابي
مثل العطش لا غسله الغيث من ماءه

واللي جهل بي فلا يسأل عن احبابي
تبي تعرف الرجل .. سل منهم اعداءه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر