.,؛,. صدر الغرام .,؛,.

اكبر فخر لي في حياتي وجودك
واكبر فخر للقلب كونك تهمه

يلي سهرت إمن الليالي رعودك
واصبحت في جوك "مطير" المسمه

تدري وش إلي سارقه من حشودك.. !
قلب (ن) سرقته منك صدري يضمه

لو ماتشيلهْ عينْ تحفظ حدودك
شلته على راس (ن) تعدى المذمه

يا اقسى تواقيتي إذا ارخى صدودك
مشراع حُبك وابحرْ بموج غَمهْ

واعلنت في معبد هوانا جحودك
والزمّت في عيني مواويل همّه

جيتك خفوق (ن) يلمس اقصى وعودك
شوقه مراسي للعيون المشمه

جيتك وانا كلي رجاوي مدودك
مد العطى يا نبض قلبي ودمه

يا كبرك بعيني ويا زود زودك
صبرك بصدري شمه الليل شمّه

محلا بساتين الغلا من ورودك
وإلاْ الشعور ألي عجز من يهمّه

ليت الدمع جرب يلامس خدودك
واللهْ لينكر من ذرفه ويذمه

عين البشر ماتوسع لربع جودك
يامالك من الشعر شطه ويمّه

النبض يسري مثل ماود مودك
والقلب يهذي لا دنا الشوق يمه

صدر الغرام إلي انحوى من عقودك
لمه عن عيون العرب هاك لمه

الخير ينضح به خوافي عمودك
ويزيد في وجه الشعور ويعمه

يا جعلني فدوى هلك مع جدودك
فدواك ليل إمن المعاني يتمه

قلب (ن) يهمه في حياته وجودك
تسواه في حضرة خواله وعمه

كود ان الاعمى من لنفسه حسودك
لانه خسر من زاد دنياه جمّه

دعيت ربي لي يبارك سجودك
"لاحط راسك" اذكر اللهْ و سمه

وان عمّ ليلك يا هناله رقودك
صلي على خير البشر زد ونمه

وإترا الرجال اثواب كل (ن) يقودك
وانتَ عليهم قمه (ن) فوق قمه