احتضار الشعر

جلست افكر واضرب ابهام ببهام
صار العقل مسرح والافكار غاره

محتار والحيره ترا هي والالهام
مصدر غذا للعقل تاره وتاره

والشعر ضاع وضيع الشعر الاعلام
خلى مدار الذوق يعكس مساره

مره يجيب افحول فالشعر واعظام
منها المشاعر يدفقن بغزاره

وكم مرةً يحكم على الشعر بعدام
بيدين جهال الادب ياخساره

غربان فالاعلام راحت لنا زيام
وكبودنا قامت تكج المراره

عالم يجمعها ويقحمبها اقحام
ويفرض على الساحه سرابيت حاره

احلام عاشوها ولازالت احلام
ومفسر الاحلام ساق البشاره

يعني كذا والا كذا عالم نيام
يدعم هل الاحلام راع التجاره

البرتقاله عذبت شلة اقزام
والبيدجانه فن وش هالمهاره

ساحه وتوضع فوقها اعلام وخيام
سوق الخضار يبيع فن وايثاره

قبه وسور وساحة انعام وزحام
والنار ما تالع بليا شراره

حراج واحد ترقبه عين سوام
ياخذ من العالم مكان وصداره

ياخوك ياسلطان ياذخر وسام
هذا زمن يفقأ مشيمة حضاره

اجهاض للعذرا بلا شرع واحكام
تاريخنا يصرخ بمعنى العباره

من ينقذ التاريخ من تحت الاقدام
ويرهي على الشيطان وبل الحجاره

المحبره جفت ومنها الورق صام
وهذا قلم يغرق بصوت احتضاره