سلام يا نسل الحرار العديمه - مرزوق بن دحيم العتيبي

سلام يا نسل الحرار العديمه
ياللي مواقيف السعد تفتخر فيك

من روس برقا كاسبين الغنيمه
ألاد عاصم والمواقيف تكفيك  

تاريخكم فيه الشواهد قديمه
لا غطرفت بين الجموع البلاجيك

عزومكم تردف وراها عزيمه
وتردون حوض الموت من دون تشكيك 

ودايم مواقفكم كبار وعظيمه
ولا به غرابه وأنت فعلك يزكيك     

يوم إنها بين الخصيم وخصيمه
تركت روق وجيت يالقرم ناصيك

ولقيت لي فزعه عليها الوسيمه
بياض وجه وعلم غانم يباريك 

على الوفاء نخوه وفزعه وشيمه
وأبشر يا مطلق ما نضيّع مساعيك

والله يا راسك ماتجيه الهزيمه
مدام راسي حي صوّت ولبيك

جمايلك في كل عليا مقيمه
وفي كل علمٍ جزل نسمع بطاريك

لك الثناء والشكر وشداد ريمه
وأول فناجيل البطوله بأياديك

وأمٍ ما جابت مثل شخصك عقيمه
يا جعلني يا طيّب الذكر ما أبكيك 

© 2022 - موقع الشعر