فكاهي [ عوق هالسنّا ] - راشد الكشف

بتّ ليلي كله أوّنا
صاحي ٍ والناس غافينا

اشتكي من عوق هالسنّا
الله اكبر منه ويعينا

صار له يومين مشقنّا
مدعي ٍ هالحال مسكينا

قلت بتوكل ومستنّا
صوب هالدختر يداوينا

قلت له هالضرس به جنّا
عالجه طالبك والحينا

طالبك تحشيه لي طنّا
يا عسى كثرته تشفينا

قال هذا الحشو له فنّا
عارفنه زين ما زينا

والضرس له علم ٍ وزنّا
فوق راسي سبعة اسنينا

قلت ماقصد لا تلومنّا
الويع لي مأثر ٍ فينا

قال صخ وانثبر منّا
بس يكفي لا تأذينا

غادي ٍ لي بنت تتحنّا
بس في صوتك تحنحينا

لا تخاف ويلحقك ظنّا
هن دقايق لو بتعطينا

قلت والله طيبكم بنّا
قدر فوق الراس والعينا

ثم هاذي صخّة ٍ منّا
لك ولي ولين بعدينا

لين زفات الفرج ينّا
لين زال اللي مشقينا

ثم صاح الهاتف ورنّا
رنة ٍ دايم تسلينا

قال راشد هاه طمّنا
يا عسى الا اهون وزينا

قلت لله الحمد والمنّا
والشكر عالزين والشينا

بعد هاك الليل والونّا
يوم قزرناه صاحينا

ما رحمني عوق هالسنّا
الله اكبر منه ويعينا

© 2024 - موقع الشعر