غزل [ كامل الزين ] - راشد الكشف

أصبحت يا بو عيون ٍ سود ودعاجه
آية حسن أبهرت لي عينه ادعاجي

وأمسيت طب ٍ لهذا القلب وعلاجه
رغم ان كل الخلايق عيّت اعلاجي

وآزمت وآزم خفوقي يرجو افراجه
من حبك اللي ابد مابه من افراجي

يا الحب الأول ويا ماضيه وسراجه
يا آخر الحب يا تاليه يالباجي

شفتك ولا شفت من يشبهك بغناجه
لأنك تربيت دلوع ٍ ومغناجي

يا حلو خدك طبيعي دون مكياجه
يا كيف لو صار فيه شوي "مكياجي"

حتى الرموش اصبحت للوجه ديباجه
وان سلهمت تم نبض القلب رجاجي

لك قلب وانا امتربع فوقه وتاجه
وانا ليه قلب ماغير انت له تاجي

يا كامل الزين زينك دايم احتاجه
والزين ميزه وكل إنسان يحتاجي

واعوام والشعر واسلوبه ومنهاجه
يرقون وارقى نوايفهم على مزاجي

واليوم لجلك غدى نيران وهاجه
وغديت من شدته ثاير ومتفاجي

شيبتني وانت توك ماتعرف حاجه
اصغير فالسن لكن ذرب الأخلاجي

تهجر ضنينك وتتعمد له ازعاجه
تتركه وحده يسامر ليله الداجي

يصبر وتسلى ف قصر ٍ عالي ابراجه
يصبر وتصبر ضواحي الحب وافلاجي

والصبر للهجر له مفتاح لإفراجه
وآنا ليه ذخر لو اتغلّق اسياجي

لك شاعر ٍ ما يهاب البحر وامواجه
بالشعر دايم يسلي قلبه الشاجي

ما فيه حيله شديد ويصعب احراجه
ياك امتلهف ويسرد آخر انتاجي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر