درب الوفا

بدري عليك الشعر لو راحت شهور
منتي لميزان القوافي جديره

يا بنت كنتي خير من يلعب الدور
واليوم صرتي بالصفوف الاخيره

هاتي ورق واخذي من ابياتي سطور
ابيات شعر من حياتي وثيره

وان كان جاك الزور من شاهد الزور
شكاواي لله ربنا نستجيره

يا بنت ما كل له احساس وشعور
ولا كل من يضحك دروبه سفيره

كم فز من حلمه من الناس مذعور
من بعد ما عينه بنومه قريره

درب الوفا يا بنت يسري به النور
ومن لا يشوف الشمس عينه ضريره

كان السراج بظلمة الليل مكسور
النور نور القلب نور البصيره

ومن لا يعذر الناس ما هو بمعذور
ومن لا يعز النفس ما راح ديره

انت ضحية باذر الورد في صخور
والورد لا ورده ولا الخير خيره

من يسمع المغمور لا ذم مشهور!؟
دروس دنيا والتجارب كثيره