نوت

نوت) وش همّي من اللي يشمت بحال الهوى
وانت ِِ لك ماطى قدم بالارض اشرف من عذول

كلّ ما مريت رجمك ذيب ٍ بقلبي عوى
عوية ٍ تشلع خفوق الليل يالرّيم الجفول

كل شريان ٍ سريتي فيه يا نوت التوى
التوى في غيبتك والقلب يا نوت امْغلول

ما ذكر لي وادي ٍ جيتي له الا وارتوى
من حنين ٍ اللي كفخ لا جاب له علم ٍ رسول

نوت يا وجه البشير افداك عمْر ٍ ونْطوى
ما انطوى الا طوى روح ٍ فدى نوت البتول

لو كشحت ضلوعي الا تنظرين الإْشتوى
لا يغرّك من شموخ الجال .والخافي يهول

لعنبوا حيّك انا والقبر الاظلم من سوى
ميّت ٍ يا نوت بعدك يا عسى عمرك يطول

المعنّى قد ترجل عن جواده وانزوى
في حمادت نوت موته نجم ٍ وجاه الافول

يسعد الله الجنون .الحق مجنون اسْتوى
والْعَقَلْ له حزّت ٍ لا قيل ماجد .وش تقول

ويش مجنون ٍ دماغه الف علاّم ٍ حوى
ما يطيع بحبّ نوت ولو لحق عظمه نحول

الهوى داء ٍ ونا يانوت مابغالك دّوى
بل طلبت الله يزيده .يوم اركيت الحمول

ما يميْزه غير قلب ٍ انكوى منْه انكوى
هو يعرْف الحب قولة عاقلٍٍ ولا مْهبول

نوت لك عهد ٍ مدامي حيّ و آشم ّ الهوى
مقفل ٍ قلبي بقفلك لا يفكّ ولا يزول

كم اصاب العشق سيّد من شديدين القُوى
خلّفه مقتول ينعى مقتله ضبحَ الخيول