أثر الهوى غبن؟ - كديميس السيحاني

يدني لي الطيف حتى احس بانفاسه
يفوح منه العطر عندي واناجيها

ياهييه لو بارسمك في اوراق كرّاسه
اهتزت اوراقها والعشق يفنيها

خلي كديميس واشعاره وهوجاسه
قصايده في الغزل وشلون يبديها

دعد وصفها التهامي واقطعوا راسه
والتضحيه في زمنّا الكل يشنيها

بيني وبينك ترى الاوضاع حساسه
احدٌ يبي غلطتي واحدٌ يغطيها

بوح القلم صرتي انتي منبع احساسه
انتي قصيدة غرامي يوم اغنيها

لو قلت وصفك لو ان الطيف هو ساسه
ياكثر من كبّر القصه ويرويها

القلب اخذتيه باقي منه نبراسه
والصدر واحات حبك واسكني فيها

كنت احسب ان الضلوع تصير حرّاسه
وحصون صدري وانا مدري طويتيها

يكفي كذا لو وصفت عيون نعّاسه
لو كان ماشفتها بالعين احلّيها

عن بعد بيّن هدبك وبان لي باسه
وبانت طعونه بصدري كيف اخفيها

اثر الهوى غبن ؟ غزر البحر ما قاسه
يابنت يكفي قوافي شعري ارضيها

© 2023 - موقع الشعر