المراجل في زمن جدّي - يحيى ال بالحارث

مع كل الغرور اللي يبان فنظرتي وشفاي
ورغم بعض الكلام اللي بعض ربعي يقولونه

انا في داخلي ارجل بشر يرفض ابد فرقاي
ليا شاف الخطا كنه على راسه يمشونه

وانا مهما انفعلت ابقى رزين ومؤمن بمبداي
انا يامي ولد يامي حزام اللي فقد عونه

درست فهالحياة اصعب دروس توقف بممشاي
وعديت الدروس بكل حكمة عقل موزونة

واخذت من المراجل لين صرت احسب واعد خطاي
لاجل لا قالوا اسمي فالمجالس ما يهزونه

وكسبت اخوان غير اخواني اللي من اصل منشاي
بني منصر رجال لاعطوك الوعد يوفونه

وكتبت من الشعر شعر المراجل ماهو شعر ال"ياي"
وانا ماني بنعم صوتي اليا قلت مضمونه

وانا ماني من اللي لادخل مجلس يصوت "هاي"
انا لاجيت اسلم بالسلام اللي تعرفونه

وانا ياما وطيت الجمر برجولي ولا قلت "ااي"
لاني عشت في واقع "زمن جدي" يسمونه

زمن جدي زمن اروع من سنين الزمان الجاي
كرم ,طيبه, وفا, أمجاد والداعي يلبونه

زمن جدي زمن ودي اعيشه غايتي ومناي
زمن فيه ان عثر شايب لقى ربع يشيلونه

زمن جدي عسى ربي يردك دعوتي ورجواي
وعسى ربي يجنبنا زمن "مايكل" وما..دونه !!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر