ياليتني ورع - عيده الجهني

ياليتني ورع يحوني على الديد
ماله هموم إلا الرضاعة هموما

ماشاف من وقته كثير التصاديد
ولاضاق صدره بالدهر ربع يوما

تعبت روحي ملت السجن والقيد
والحظ عيا من مطيحه يقوما

وين أبتعد وأنا عن العالم إبعيد
عنهم نفاني واقعي للحلوما

قمت اتقي وأمشي عن الناس بالحيد
يوم إن مشيي بالعدل فيه لوما

وإخترت عن حلو المنام التساهيد
وبالليل خاويت السهر والنجوما

أشكي لها وأبكي وآنا أعيد وآزيد
وماشفت منها كود طرف بسوما

لي عندها في كل ليلة مواعيد
وأتلى الوعد قلبي لغيره يروما

تزهد بي الدنيا وأنا اللي بها إزهيد
ماشفت لي فيها مرام ولزوما

ولو بشتكي همي على الناس شيفيد
مادام أنا صاحي وهالناس لوما

ماشفت حولي غير من يضمر الكيد
متلون في كل بحر يعوما

وإلا عدو نكبتي عنده العيد
وإلا هبيل يحسب انه فهوما

أخير لي نوم القسا دون توسيد
نومتي فوق الرياش النعوما

مرتاح بالي مالفكري تحاديد
مادام ماني للخلايق ظلوما

© 2024 - موقع الشعر