بديت بأسمٍ مايسمى غيره - نياف بن نمّاس السميري

بديت بأسمٍ مايسمى غيره
رب العباد الواحد المعبود

اللي بسط سبعٍ وسبعٍ رفعها
وبقدرته تجري هبوب النود

ياغافر الزلات تغفر ذنوبي
يوم الجوارح للعباد إشهود

في ساعةٍ ما ينفع المرء صاحبه
وكلٍ على ماقدّمه محدود

ولا تنقص السيئآت مثقال ذرّه
ولا تقبل الحسنات ذرّة زود

ومن جا كتابه في شماله ضايع
ومن في يمينه يبلغ المقصود

وكلٍ يحصد اللي زرع عند حزّته
ياناس عمر الادمي محدود

ولو طالت الايام فالعمر زايا
والنفس تصعد واللحم للدود

وترى عمود الدين خمس الفرايض
واكمل صيامك وابذل المجهود

واد الزكاه وحج حجّة مخلص
تنجيك يوم الماقف المعهود

والوالدين لهم حقوقٍ كثيره
وعن والدينك يافتى منشود

في طاعة الولدين تكسب فضيله
ربوك يبون السلف مردود

ولا يلحق المولود جزى الوالد
لو إن ماضية السنين تعود

وترى النبي وصى على جار بيته
والضيف قدم له من الماجود

وخوي جنبك لاتخون عهوده
واف العهد عند العرب محمود

ولا ترافق الا طيّبٍ تعتزي به
عند اشتعال النار في البارود

واليا نصيته في اللوازم يرسي
واليا نصاك تصير راس حيود

ومن رافق الخايب فلا شك خايب
ومرافقه يجلب لك المنقود

لا نافعٍ نفسه ولا منه خيفه
عسى يصيبه حامي العبرود

ومن يبذل المعروف في غير صاحبه
سواة زارع في الصباخي عود

يضحك اليا منه بغا منك حاجه
واليا بغيته يابس العنقود

وترى الحمول إلها جمالٍ تشيلها
والحمل مايشتاله المفرود

ولا كل من هاز المراجل جابها
ولو في يديه مهندٍ محدود

ولاكل من غاص البحر جاب درّه
وقبل تحوّل ميّز الصعود

وبنت الردي لو يعجب الناس زينها
يجي ولدها في اللقا شرود

واليا سرح ضوّا عليك مطمّه
واليا بحثته صار حشو إبدود

ولاظنّتي يشره عليه العاقل
وقدمه طريق اهل الوفا مسدود

ولا تاخذ الا من بنات الحمايل
ترى ولدها ينتسب لفهود

ينفعك وان جا للمواطي ثالث
ريفٍ لربعه في الليال السود

واليا سهرت مع الليالي يسهر
يلطف بحالك والعباد رقود

واليا زهمته قال سمع وطاعه
بكلامٍ احلى من حليب القود

ووقت الرخا ماهوب مثل الشّدّه
وحنا بأنانٍ والليال مهود

في ظل حكام الجزيره سعدها
آلاد مقرن اسرة آل سعود

درع الجزيره في الليالي ونورها
يفرح بهم من جالهم مضهود

وتمت وصلا الله على سيد الملأ
عداد ماحن السّحاب رعود

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر