ماني بناشدك في وصلك وهجرانك
خلك كذا مثل ماقفيت ترجع لي
تعبت وأنا ارتجي لطفك وتحنانك
وسمعت هرجك وأبيك اليوم تسمع لي
عيدان قلبي تدلى فوق حيطانك
وصرت أتوقى العثاير عنك في فتلي
وكنت احسب أني بعينك داخل أجفانك
واليوم قد بنت لي تنوي على قتلي
وأقول لاتحسب أني مرخص شانك
انته طرفت العيون بكفك العجلي
ماني ردي بكفه شال وردانك
أجزى الردي بالكرم واصلي على فصلي
خليتني كني اللي مس شريانك
واودعتني كني اللي جرت في عملي
أرحمك رحمه غرير عند شيبانك
وأقدرك بالوفاء من طبعي النبلي
ومدري علامك لقتلي تكرب عنانك
وتركب على صهوتك وتخاوي الهزلي
وخبري بك الطيب دايم فوق عنوانك
واليوم لأهل الردى بيتك يوصف لي
ياخانه الوقت مدري وين سجانك
أنا السجين اقضبيني وافتقي حبلي
حبلي قصيدي وطرحي دك ميدانك
اقره وحلل حروفه واتقن الصهلي
انا الذي في زمانه دوم ماخانك
ارعاك وابكي لفقدك وانت وش تبلي
بلواك زود الغرور وحوم عقبانك
تحسبك حاكم ورعيانك تعقب لي
لو فيه احد فالزمن مثلي معك صانك
لا اقول يمكن بديت الهون من جهلي
لكن انا حاشمك في قصرت اردانك
تلوذ بي لاقرع للقوم بالطبلي
اقف وقوف الشجر واثبت لعدوانك
واموت لاجلك لو انك ماتورث لي
واليوم هاك القصيد وقش غرضانك
ودور من الناس شخص فيك منهبلي
بدلت وصلك ببعدك شوف صدقانك
وبدلت موتي معاك بشخص يضحك لي
وان كان تبغى الهواء لا تصك جنحانك
ترى حرور القوايل تكوي المبلي
وخذها نصيحه لفيلك قبل مرجانك
بدل عواجتك في وقتك على العدلي
ماعاد تنفع لذاتي صك بيبانك
وخل الذي تحتريه يبادلك وصلي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين