الجمــــــــــــرة - نواف الدحام

مادري علام البشر تهديني الجمره
وانا الذي لا بغوني ماقدح جمري

اصير له عين قبل يصير لي نظره
واحفظه حفظ الرموش اللي كست نظري

بس الزمن ياجماعه وانكسر ظهره
وانا الذي قبل اعكك به على ظهري

واليوم نواف والله نافذ صبره
واللي مغيرك خله يحتمل صبري

عرفك مرض والمرض قد شد بي وسره
والله يجمل هجوسي لا انقطع وسري

والكيه الخاطية لو جنّبت ماابره
والجرح لا طال واشتم هيه وش يبري

بدلت نومي معاك اليوم في سهره
وعمضت جفني وقدرك ماحشم سهري

واليوم هذا التعب اقره وانا با اقره
وان كان ماتعرفه قد ضيع المقري

مديت كف الوفاء ولا انت في قصره
وانا الذي خابرك ماترغب القصري

الوقت لف الهجوس بضامر المكره
وانا طبوعي وفاء ماعشت بالمكري

رقيت عالي سنود ولا ابغي الحدره
واللي معك دايم ياهيه في حدري

خل الموادع يحل ولا تجي تشره
واللي مثل فعلتك لو باع مايشري

الدمعه الذارفه ترها سبب شعره
ولا تحسب ان باقي لك حرف في شعري

ماعاد تستاهل من الشعر لو شطره
خل الذي جملك يقتات من شطري

والحر يكفيه عيشه يوم في وكره
والبوم مثلك بعش ماعرف وكري

© 2022 - موقع الشعر