الله مــن قــلب

الله من قلبٍ وزا به مليله
كثرت هواجيسه وروحي اكلها

هات القلم واكتب بيوتٍ جزيله
بيوت شعرٍ والردى مادخلها

بيوت منقيه ولوهي قليله
نصايحٍ تهدا على اللي قبلها

أشوف لي وقتٍ غريبٍ مديله
وشوف لي دنيا على الله عدلها

دنيا علي الاجواد راحت سحيله
محدٍ يميز مرها من عسلها

كثرت مشاكلها وصارت طويله
واسباب قل الدين ضيع أهلها

ان اقبلت كنها سحاب المخيله
مزنٍ على الوديان سيل فحلها

يشدي نبات في شغايا مسيله
متخالطٍ نوارها مع نفلها

وان أدبرت فيها سيوفٍ صقيله
تظرب بحد السيف محدٍ سألها

كم صفةٍ راحت بليا عقيله
راحت بهم الايام يمرس عجلها

دنيا تفرق العميل وعميله
والله يعلم ويش تالي عملها

معاد تصفي للخليل وخليله
عشره ليالي مايطول أملها

جانا زمان ماعرفنا لجيله
ناسٍ على الدنيا كثيرٍ جهلها

خلت فروض الوقت دون النفيله
وان سمعت المذن تزايد كسلها

تحلق لحاها والملابس طويله
ولاعاد تعرف نوقها من جملها

وعيال الحمايل ما تهاب الفشيله
والذيب يصبح خايفٍ من ثعلها

وجانا من المغرب أمورٍ مهيله
ومخططات الغرب جتنا احيلها

وغزوٍ يراودنا على كل حيله
جاب المعاصي والمشاكل دبلها

جيل على الاسلام يغلي غليله
الله يبطل كيدها ويخذلها

ضيع شباب ناشٍ عزتيله
قلد اسلوم الغرب حتى وصلها

خطوى الصبي لا جاك عاين زميله
كلٍ على شكله دروبه جدلها

أما غشاه اللوم عند الحليله
واللى رقا العليا بعالي مثلها

من دور العليا بدرب الجميله
دروب المراجل عز للي فعلها

ومن دور الهسات يلقي الفشيله
ومن دور العالات يلقى بدلها

ومن طاوع الشيطان ضيع دليله
وضيع حياته بين تايه شللها

والمرجله والدين عز وفضيله
والله عوين اللي جهوده بذلها

وكثر التعاون عز بية وسيله
ربع هداها الله وعزه شملها

وكثر المشاكل ما تعز القبيله
وكثر التفرق للجموع يخذلها

وربع بلا عقال ماهي دليله
وربع بلا جهال يكثر فشلها

ورجل بلا ربع عزومه قليله
ويمناً بلا يسرا عطيبٍ شللها

يصبر على العجفا لوهي هزيله
ويصبر على جور الليالي وميلها

ويصبر ولو جاه من الناس عيله
ويسايس الدنيا ويترك زعلها

من خوف لا تصبح حياته ذليله
وما يقدر الصعبات لجا نكلها

ويا من على ربعه دبوره يشيله
متكابرٍ نفسه ويتبع زللها

ماجرب الدنيا عصور الدبيله
يوم الحرايب كل نارٍ شعلها

واليوم في الاسلام يسحب شليله
ويقول أنا عنتر بماضي جهلها

متكابرٍ راسه عسا الله يزيله
ماقدر النعمه وروحه سألها

ويش الذي نهار القيامه يجيله
نارٍ وجنه وفي حديهن نزلها

أما دعي عليه وللى دعيله
وكلٍ يواجه سمعته ويحملها

تمت وصلوا عد وبل المخيله
وعداد عشب نابتٍ في سهلها