في سؤالي غبا .. لو قلت من تشبهين؟
عيب يطري على بالي وعيب اكتبه
لو يقولون : " يخلق م الشبه اربعين "
أقدر اقول : وجهك .. ماخلق له شبه
صعب هذا " البياض " انه يجي مرتين
في وجوه بزيف اللون متقلبه
قبلك الشعر انا وياه : سيف ويدين
ماغلبني .. ولافكرت كيف اغلبه
وبعدك اعلنت شكي .. صار للشعر عين
يعترف في رداة اصله .. وضعف نسبه
قيديني .. وخليني بضعفي حزين
لين يفصح قصيدي واعرف من انجبه
قيدك اول تمرد .. في نضال السجين
لاتفكين قيدي .. يمكن استوعبه
باكتبك في السهر .. والصبح .. والياسمين
في مرار القصيد .. وف اعذبه .. واكذبه
ب اكتب .. وب اشطب الطاروق : غث وسمين
بيت ما" حلله " وجهك " حرام " اشطبه
وجهك " استاذ " .. واطفال الشعر حالمين
يدهشون المعلم .. مره وينتبه
في عيونك شباب الحرف .. يرجع جنين
من جديد احلم اربيه .. واهذبه
لازم اغلط واحاول .. واغلط وتعذرين
فضة الشعر حولي .. والبعيد ذهبه
أجمل الشعر .. بيت ٍ كثر ماقلت زين
ارجع انقض يقيني فيه .. واشك به
علميني أشك .. ولاأصل لليقين
لو وصلت ليقيني .. وش بعد أكتبه ؟!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر