طبت الحفله تبي تلفت انظار العيون - منصور بن جعشه

طبت الحفله تبي تلفت انظار العيون
ما درت عن سم كبدي والا ياعوينها

وسلهمت صوبي وانا كارهن كل الركون
واغمزت لي من سحاها يالبى عينها

اشهد انها من حلاها على قلبي تمون
واشهد انها من قساها تعاند لينها

اقبلت والروس تخضع على حد المتون
وقفت قومات بقعا على رجلينها

وقفوا سادات من كل شكل وكل لون
وصفقوا يوم اقبلت واقبلوا ناصينها

وابتدى ليل الطرب واعزفوا كل الفنون
ورقصها في مشيها واهجدوا مغوينها

واقبلت صوبي وانا عايشن حاله سكون
وفسرت لي نظرتي حكيها في عينها

اقبلت بأعجاب تمشي على خفه وهمون
وقفت من غيها واشرت بايدينها

قالت انت!وقلت انا؟قالت ايه من تكون؟
تحسبني مثل باقي العرب في حينها

قلت انا عبدن ضعيفن يموت ولا يهون
مغني نفسي فخر مارضيت اهينها

شاعرن تصعب بيوته على بعض اللحون
وانتي اصعب من قصيده على تلحينها

وجاتني ما عاد فيني احاسيس وشجون
وسمعتني جمله حلوها ياشينها

انكم قوما تقولون مالا تفعلون
وادبرت واليوم يا وين انا وياوينها

وخلدت في داخلي من حلا اللحظه طعون
واللتوت شلفا غلاها على سكينها

وكانها في ذمتي فالعرب توفي الديون
بس هذي روحت ما وفتني دينها

بواسطة العضو : عبدالله بن جمعه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر