اقبلت ياوجه الغلا .. حيّ هالزّول
زول ٍ تغيب عباد ربّي ليا غاب
تطلع طلوع سهيل من حول لا حول
وتشّخص لك عيون .. وتلافت لك أرقاب
ومن يوم جيت الله وكيلك على طول
سلامك عتاب !! وسواليفك عتاب !!
طوّل علي بالك عسا عمرك يطول
ماكل موقف تنشرح فيه الاسباب
عطني يدينك وأنثر الليل مجدول
خلّه يطير أسراب .. ويعوّد أسراب
وأضحك وفرّق جمرتينك عن اللول
بفتح لك سموعي قبل ما افتح الباب
خمر الكلام اللي من شفاك معسول
أبيه يدرج في عروقي وينساب
سوالفك فيها من السحر مفعول
تأثيرها على الجوارح والاعصاب
بأملا عيوني من تهاياك وأقول :
ياوجه صبح ٍ لبّس الليل جلباب
عذر القصيد إليا قصر عنك مقبول
أوصافك أكبر من مدى شعر وإعجاب
عودك معزّل ومتنهّض ومفتول
اليا تعدّل رمح واليا انحنى داب
ومعنّقك فارع و زامي ومنتول
وصدرك جمع مالذ كلّه وماطاب
وسودك طلايع قوم وسيوف وخيول
خيّالها يارد على الموت ماهاب
ايّووووه من صحوة هدبها ويحّووووول
وإن سلّهمت ( هذا بلا ابوك ياعقاب )
قريب لكنّك بعيدٍ عن النول
وا حر كبدي حرّة الظن لاخاب
ماكل مجدٍ يبلغ المرء معقول
اللي ماجاب حصان أبو زيد وش جاب
من لا جمع راسك براسه على طول
والا يقضّي تالي العمر عزّاب

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر